Çамрăксем хушшинче ирĕклĕ майпа кĕрешесси вăй илсе пырать. Авалхи тата халăх юратакан спорт тĕсĕ районта та аталанать.

Акă январĕн 12-мĕшĕнче "Хастар" физкультурăпа спорт комплексĕнче ирĕклĕ майпа кĕрешекенсен уçă турнирĕ иртнĕ. Икĕ куна пынă турнира РФ пĕтĕмĕшле вĕрентĕвĕн хисеплĕ ĕçченне Ю.Шереметьева асăнса ирттернĕ. Унта республикăри районсемпе хуласенчен 100 ытла çамрăк хутшăннă. Хальхинче спортсменсем Иваново хулинчен те çитнĕ.

Хăйсен ỹсĕмне кура Хĕрлĕ Чутай шкулĕнче вĕренекен Вадим Иванов пĕрремĕш вырăна тивĕçнĕ, Борис Булаткин Даниил Столяров, Владимир Недорезов тата Кирилл Перепелкин виççĕмĕш вырăнсене йышăннă. Палăртмалла, çамрăксем "Хастар" ФСК-ан ирĕклĕ майпа кĕрешекенсен уйрăмне çỹреççĕ, пултарулăхне туптаççĕ. Вадим Иванов вара çак спорт тĕсĕпе пĕрре мар пьедесталăн пĕрремĕш картлашки çине тăнă, район тата республика чысне хỹтĕленĕ. Спортри çитĕнĕвĕсемшĕн "Артекра" та пулнă.

Вячеслав ДАДЮКОВ, "Хастар" ФСК директорĕ:

- Юлашки çулсенче çамрăксем спортпа тусли самай сисĕнет. Вĕтти-ватти те сывă пурнăç йĕрки тытма кăмăллать. Çакна валли майсем çителĕклĕ. Районти "Хастар" физкультурăпа спорт комплексĕн алăкĕсем пурин валли те яланах уçă. Кунти условисем питĕ меллĕ те хăтлă. Илемлĕ юрă-кĕвĕ сассипе тренажер залĕнче хатĕр-ленме, волейболла, футболла выляма, бассейнра ишме май пур. Йĕлтĕр çине тăма кăмăллакансем "Хастар" çумĕнчи трасса çине тухма пултараççĕ. Ĕç хыççăн та, уроксем хыççăн та ярăнма пулать - çутă пур. Йĕлтĕр çуккисене валли прокат та ĕçлет.

ФСК-ра район тата республика шайĕнчи ăмăртусемпе турнирсем тăтăшах ирттеретпĕр. Хăнасем те кунти условисемпе кăмăллă. Эпир спорт тусĕсене яланах хапăл.