Пушар хăрушсăрлăхĕ пирки аса илтерсех тăратпăр. Апла пулин те округра "хĕрлĕ автан" хуçаланнă тĕслĕхсем пур. Июлĕн 1-мĕшĕ тĕлне 10 пушар пулнине регистрацилерĕмĕр. Пĕлтĕр ку тапхăрта вут-çулăм 13 хутчен алхаснăччĕ. Кăçал пушара пула пĕр çын суранланчĕ.

Округри территори пайĕсемпе илес пулсан, Хĕрлĕ Чутайра виçĕ пушар пулчĕ, Хусанушкăнь территори пайĕнче - иккĕ, Ачкасси, Атнар, Пантьăк, Питĕркасси тата Кив Атикасси территори пайĕсенче - пĕрешер.

Пушар сăлтавĕсем, паллах, тĕрлĕрен: электрооборудованипе усă курнă тата ăна вырнаçтарнă чух правилăсене пăхăнманнипе виçĕ пушар алхасрĕ; кăмакапа усă курнă тата ăна вырнаçтарнă чух правилăсене пăхăнманнипе - иккĕ, вут-çулăмпа тимлĕхсĕр пулнипе - тăваттă, ытти сăлтавсене пула - пĕрре.

Хисеплĕ граждансем, пушар хăрушсăрлăхĕн правилисене çирĕп пăхăнмалла, юсавлă электрооборудованипе çеç усă курмалла. Кăмакасен юсавлăхне тĕрĕслесех тăмалла. Пĕччен пурăнакан çынсене те тимлĕхрен вĕçертмелле мар. Ыттисен айăпĕпе кỹршĕри çемьесем те шар курма пултараççĕ-çке. Çуллахи каникул вăхăтĕнче асламăшĕ-аслашшĕ тата кукамăшĕ-кукашшĕ е тăванĕсем патĕнче ялта чылай ача канать. Вĕсене те пушар хăрушсăрлăхĕн правилисене аса илтерсех тăмалла, шăрпăкпа выляма юраманнине каламалла. Шăрăх çанталăкра та асăрхануллă пулмалла. Эрехпе айкашни те нумай чухне инкек патне илсе çитерет. Çакна асра тытасчĕ. Должноçри яваплă çынсем профилактика ĕçĕпе темĕн чухлĕ ĕçлесен те, хамăр тăрăшмасан, çын харпăр хăйĕн пурнăçĕшĕн яваплăха туймасан пушарсен хисепне чакараймăпăр.

Алексей ЯРАБАЕВ, пушар асăрхавĕпе профилактика пайĕн начальникĕ