Июнĕн 30-мĕшĕнче округ администрацийĕнче нацисемпе конфессисем хушшинчи ыйтусемпе ĕçлекен Канашăн ларăвĕ иртрĕ. Ăна округ пуçлăхĕ Иван Михопаров ертсе пычĕ.

Пухăннисем кăçалхи пĕрремĕш çур çулхи лару-тăрăва тишкерчĕç, экстремизм енчен йĕркене пăснă тĕслĕхсем пулманнине палăртрĕç. Чи малтанах Хĕрлĕ Чутай чиркĕвĕн настоятелĕ Максим атте сăмах илчĕ, округра тĕрлĕ тĕн çыннисем хăйсене лăпкă тытни пирки пĕлтерчĕ. Вăл округри çамрăксем чиркĕве сахалрах çỹренине палăртрĕ, çитĕнекен ăрупа тĕл пулса калаçусем ирттерме кашни шкулах çитме тăрăшнине асăнчĕ. Ларура малашне те нацисемпе конфессисем хушшинчи тăнăçлăха упраса хăварас, ăс-хакăл хаклăхĕсене çирĕплетес тĕлĕшпе ĕçлеме палăртрĕç.

Иккĕмĕш ыйтупа округ администрацийĕн вĕрентỹ пайĕн специалисчĕ Ольга Порейкина калаçрĕ. Вăл сывă пурнăç йĕркине тытса пыни çитĕнекен ăрăвăн ăс-хакăл аталанăвĕн тĕп факторĕ пулнине палăртрĕ, ку енĕпе вĕренỹ учрежденийĕсенче мĕнле ĕçлесе пыни, шкул ачисемпе тĕрлĕ йышши мероприятисем ирттерни çинчен тĕплĕн каласа пачĕ. Иван Николаевич малашне çамрăксене тата ытларах мероприятие явăçтарма сĕнчĕ.

Асăннă канашăн членĕсем вырăнти хăйтытăмлăх органĕсен, тĕн тата общество организацийĕсен нацисемпе конфессисем хушшинчи килĕшĕве çирĕплетес, авалхи ăс-хакăл хаклăхĕсене сыхласа хăварас тата çамрăксем хушшинче сывă пурнăç йĕркине сарас тĕллевпе малашне те пĕр-пĕринпе хутшăнса ĕçлемелли пирки палăртрĕç.