Çак хитре сăнỹкерчĕксенче - Калкасси ялĕнчи чарăну. Ку чарăнуран шкул ачисем ларса каяççĕ.

Ăна сăрласа илемлетекенĕ - çак ялта ỹссе çитĕннĕ пирĕн ентеш Станислав Маков ỹнерçĕ. Ялти çынсем ыйтнипе вăл чарăнăва ỹкерсе хитрелетнĕ, унтан чăн-чăн арт-объект туса хунă. Кунта халĕ кĕнекесем, ручкăсем, кăранташсем, саспаллисем, цифрăсем, глобус тата савăнăçлă смайликсем «пурăнаççĕ». Çаксем пурте ачасене савăк кăмăл-туйăм парнелемелле. «Учись! Мечтай! Твори!» çырни - сĕнỹ кăна мар, çамрăк пассажирсем валли чăн-чăн девиз пулса тăрать. Ашшĕ-амăшĕпе шкул ачисем асăннă пуçарупа питĕ кăмăллă.

Станислав Петрович Маков – Калкасси ял каччи. Унăн Турă пани пур - ỹнер тĕнчи Стаса ачаранах илĕртме пуçланă. Амăшĕ каланă тăрăх, ỹкерес талант ачана ашшĕ енчи йăхĕнчен куçнă. Ик-виç çулта чухнех Стас урама выляма тухмасăр нумай хушă ỹкерсе е сăрласа ларма пултарнă. Çак туртăма асăрхасанах ашшĕ-амăшĕ, кукамăшĕ ачана сăрламалли хатĕр-хĕтĕр туянса пама тытăннă. Тепĕр чухне ача хăех канфет вырăнне сăрă, кăранташ таврашĕ илсе пама ыйтнă. Аслă классенче каччă пур-çук укçапа строительсен сăрине туянса хăйĕн пултарулăхне стенасем çинче тĕрĕслесе пăхма пуçланă.

Тĕплĕнрех - «Пирĕн пурнăç» хаçатра.