Этем çутçанталăкри пысăк инкексене хирĕç тăрайманни паллă.

Çулталăк пуçланнăранпа Чăваш Республикинче çулăмпа асăрханмасăр усă курнăран типĕ курăк çуннă 33 тĕслĕхе шута илнĕ. Пĕтĕмпе - 20 гектар лаптăк çинче. Типĕ курăк çунтарнă чухне 1 çын пиçсе кайнă, çулăм сарăлнипе 8 çурт-хуралтă пĕтнĕ.

Аса илтеретпĕр: апрелĕн 10-мĕшĕнчен пуçласа республикăра пушара хирĕç режим вăйра. Çавна май ку тапхăрта коммерциллĕ мар сад юлташлăхĕсенче, вăрмансенче, ялсенче кăвайт чĕртме, çỹп-çап, типĕ курăк çунтарма юрамасть. Мангалпа тата ытти хатĕрпе усă курса шашлык ăшалани те - йĕркене пăсни. Сỹнтермен пирус тĕпне çĕре пăрахмалла мар. Çынсем типĕ курăк, çỹп-çап çунтарнине курсан вĕсем патне пырса ку хăрушлăх кăларса тăратни пирки аса илтермелле. Ку ыйтупа ачасемпе те калаçмалла.

Пушара хирĕç режим вăйра пулнă чухне йĕркене пăссан штраф тỹлеттереççĕ. Граждансен - 10-60 пин, харпăр усламçăсен - 60-80 пин, учрежденисемпе организацисен 400-800 пин тенкĕ тỹлеме тивĕ. Пушар çын пурлăхне е сывлăхне сиен кỹрсен граждансен 40-50 пин тенкĕ штраф тỹлемелле. Пурлăха асăрханмасăр сиен кỹнĕшĕн РФ УК-н 168-мĕш статйипе килĕшỹллĕн уголовлă майпа явап тыттараççĕ. Айăплав çирĕп: 120 пин тенкĕ таран штраф хума е 1 çул таран ирĕксĕр хăварма пултараççĕ. Çулăм вăрман çине куçрĕ пулсан РФ УК-н 261-мĕш статйипе килĕшỹллĕн явап тытма тивĕ, штраф - 500 пин тенкĕ таран. 4 çул таран ирĕксĕр хăварма та пултараççĕ.

Тĕплĕнрех - «Пирĕн пурнăç» хаçатра.