Палăртма кăмăллă, Хĕрлĕ Чутай салин Турă Хĕресне Çĕкленĕ чиркĕвĕн реконструкцине тума палăртаççĕ. Хальхи вăхăтра проектпа смета докуменчĕсене хатĕрлес ĕç пырать.

Иван МИХОПАРОВ, округ пуçлăхĕ:

- Пирĕн умра пысăк ĕç тăрать. Хĕрлĕ Чутай салин Кивĕ центрĕнчи чиркĕве юсаса çĕнетмелле. Пурте кураççĕ ĕнтĕ, ун çывăхĕнчи пĕве территорийĕнче хăтлăх кỹрес енĕпе эпир юлашки çулсенче чылай ĕç пурнăçларăмăр, вĕсем малалла тăсăлаççĕ. Пирĕн храм та çĕнелсе илемленсен Кивĕ центр сăнĕ самаях ырă енне улшăнĕ, чиркĕве çỹреме те кăмăллăрах пулĕ.

Халăхпа пĕрле пулсан, пĕрлехи вăйпа тăрăшсан, эпир чиркĕвĕн чан вырăнне юсама çителĕклĕ укçа пухма пултарăпăр. Ентешĕмĕрсем, аякра ан тăрăр, ырă ĕçе хутшăнăр, кашнин тỹпи пĕлтерĕшлĕ!

Максим ЗАРУБИН, Хĕрлĕ Чутай салинчи Турă Хĕресне Çĕкленĕ чиркĕвĕн настоятелĕ:

- Чиркỹ 225 çул тултарчĕ. Çак юбилейччен чылай ĕç пурнăçланчĕ: чиркỹ вырнаçнă çĕре 10 çуллăх усă курма пире тỹлевсĕр пачĕç тата прихут чиркĕвĕн харпăрлăхçи пулса тăчĕ (хальччен унăн хуçи пулман). Кунсăр пуçне иртнĕ çул прихута çỹрекенсем инженерипе проект докуменчĕсене тума 350 пин тенкĕ пухрĕç. Вăл чиркĕвĕн чан вырăнне (колокольня) çеç юсаса çĕнетме ирĕк парать. Унăн никĕсĕпе куполĕ таран юсас ĕçсен хакĕ 10 миллиона яхăн тенкĕпе танлашмалла. Анчах та федераллă саккун тухрĕ, çак чан вырăнĕн юсавне, тен, хамăр вăйпах тума ирĕк пулĕ. Халĕ саккуна тишкереççĕ, хăшне хамăр вăйпа, хăшне регион шайĕнчи культура еткерлĕхĕ шутланакан объектсене юсама лицензи илнĕ ятарлă организаци çеç тума пултарнине тĕпчеççĕ.

Тĕплĕнрех - "Пирĕн пурнăç" хаçатра.