Ача-пӑча кӗнекин эрни - ҫамрӑк вулакансемпе вӗсен ашшӗ-амӑшӗшӗн чӑн-чӑн уяв. Ҫак вӑхӑтра вулавӑшсем савӑнӑҫпа, чӗрӗлӗхпе тулаҫҫӗ, ачасем кӗнекесен тӗлӗнмелле тӗнчине путаҫҫӗ. Нумаях пулмасть тĕп вулавăшри «Ҫемье вăйĕ» залра Ача-пӑча кӗнекин эрни иртрӗ. Вӑл ачасем валли ҫӗнӗ майсем уҫрӗ, манӑҫми туйӑмсем парнелерӗ.

Эрне «Кӗнекене уҫсан - тӗлӗнтермӗшсем пуҫланаççĕ!»  девизпа иртрӗ. Ачасем юмах чарăнăвĕсем тӑрӑх ҫӳренӗ май, пултарулӑхпа вулав атмосферине путрӗҫ. Программӑна вӑйӑсем, конкурссем тата пултарулӑх ĕçĕсем кӗчĕç. Ачасем вӑхӑта хаваслӑ ирттерчӗç кӑна мар, хӑйсен ӑсталӑхне те аталантарчĕç. Вӗсем хӑйсен историйӗсене шухӑшласа кӑларчĕç, пӗчӗк спектакльсем лартрĕç, ҫакӑ куракансене савӑнтарчĕ.

Уйрӑмах «Вӑйӑра халӑх пӗрлӗхӗ» кĕнеке куравĕ кӑсӑклӑ иртрӗ. Ачасем вӑйӑсем урлӑ тӗрлӗ халӑх культурипе паллашма май пуррине пӗлчӗҫ. Ҫакӑ вӗсене йӑла-йӗркене упрани мӗн тери пӗлтерӗшлӗ пулнине ӑнланма пулӑшрĕ.

«Туслӑхӑн литература кӗперӗ» юмахсен сехечӗ те ҫутӑ туйӑмсем хӑварчӗ. Вулавăш ĕçченĕ юмахсем халӑх туйӑмне сӑнланине каласа пачӗ, вӗсем мӗн тери хӑйне евӗрлӗ пулнине кӑтартрӗ. Ачасем кӗнеке куравӗпе викторина урлӑ халӑх юмахӗсен сăнарӗсемпе паллашрӗҫ.

Тӗплӗнрех - "Пирӗн пурнӑҫ" хаҫатра.