Хватукассинче пурăнакан тыл ĕçченĕ, Сăр хỹтĕлев чиккин строительствине хутшăннă Нина Яковлевна Тимофеева нумаях пулмасть 94 çул тултарнă. Нина Яковлевна 1932 çулхи мартăн 25-мĕшĕнче Шулю ялĕнче вăрманçă çемйинче çуралнă. Хĕрача Шулю ялĕнчи çичĕ çул вĕренмелли шкула пĕтернĕ хыççăн тус-тантăшĕсем пекех тỹрех ĕçе пуçăннă. Вăрçă çулĕсенче 12 çулхискер ытти ачасемпе пĕрле Сăр хỹтĕлев чиккисен строительствине хутшăннă. Вăрçă хыççăн бригадăра ĕçленĕ, унта ал айĕнчи япаласенчен (йывăçран тата хулăран) карçинккасем авнă, çунасем тунă, мунчаласем çыхнă. Шăпах унта Нина Яковлевна Леонид Григорьевичпа паллашнă. Вăхăтран çамрăксем çемье çавăрнă, пĕр-пĕриншĕн çирĕп те шанчăклă тĕрев пулса тăнă.

Нина Яковлевнăн ĕç биографийĕ пĕр татăлми «Искра» колхозпа çыхăннă. Кунта вăл мĕн тивĕçлĕ канăва тухиччен тăрăшнă, ĕçе пĕтĕм вăйне кăна мар, чунне те панă. Ĕçе тỹрĕ кăмăлпа пурнăçланăшăн, лайăх кăтартусем тунăшăн Тав çырăвĕсемпе Хисеп хучĕсене, «Ĕç ветеранĕ» хисеплĕ ята тивĕçнĕ. Мăшăрĕ пурнăçне обществăлла ĕçе халалланă: парткомра тата обкомра ĕçленĕ, çавăн пекех Пантьăк ял Канашĕн председателĕ пулнă.

Тĕплĕнрех - «Пирĕн пурнăç» хаçатра.