Мартăн 12-мĕшĕнче округра пĕрремĕш хут «Ялкир вулавĕсем - 2026» фестиваль иртрĕ.

Мероприятие хутшăнма Мăн Этмен шкулне округри пĕтĕм шкултан 60 яхăн ача пухăнчĕ. Фестиваль-конкурс виçĕ номинаципе иртрĕ: 1-6-мĕш, 7-11-мĕш классенче вĕренекенсем Çĕн Ирчемес ялĕнче çуралса ỹснĕ Петĕр Ялкир поэт шăрçаланă хайлавсене тата ачасем хăйсем çырнă сăвăсене илемлĕ те палăртуллă калассипе тупăшрĕç.

Конкурса хутшăнакансене чăваш халăх поэчĕсем Раиса Сарпи тата Светлана Асамат, хĕрлĕчутайсен «Чавал» ентешлĕх канашĕн председателĕ Владимир Михайлович Савинкин, Петĕр Ялкир ячĕллĕ преми лауреачĕсем Светлана Вячеславовна Яруткина, Лариса Николаевна Петрова, Зоя Сывлăмпи итлерĕç. Чи пултаруллисене сцена çинче чысларĕç.

Фестиваль-конкурс çĕнтерỹçисемпе паллашар-ха. Пĕрремĕш ушкăнра Хĕрлĕ Чутай шкулĕнчи Дмитрий Овчар «Чăвашсем, чăмăртанăр!» сăвва вуласа (вĕрентекенĕ - М.Н. Васильева) пĕрремĕш вырăн йышăнчĕ; Питĕркасси шкулĕнчи Елизавета Краснова «Раççей пичче» сăвва (Л.В.Жукова), Хĕрлĕ Чутай шкулĕнчи Артем Ухтеров «Туссем» сăвва (М.Н.Васильева), Хĕрлĕ Чутайри Культура çуртĕнче ăсталăхне туптакан Олеся Назарова «Шанчăк» сăвва (Н.В.Чишкина) вуласа иккĕмĕш вырăна пайларĕç. Мăн Этмен шкулĕнчи Анна Щеголева «Çутă ĕмĕтсем» сăвва (И.С. Михеева), Хĕрлĕ Чутай шкулĕнчи Даниил Шурбя «Йăмра» сăвва (В.Е.Иванова), Питĕркасси шкулĕнчи Мария Филиппова «Туссем» сăвва (Л.В.Жукова) вуласа виççĕмĕш вырăна тивĕçрĕç.

 Тĕплĕнрех - «Пирĕн пурнăç» хаçатра.