Мартăн 13-мĕшĕ тĕлне округра "хĕрлĕ автан" виçĕ хутчен хуçаланма ĕлкĕрчĕ. Иртнĕ çул çак тапхăрта икĕ пушар пулнине регистрацилерĕмĕр. Палăртмалла, кăçалхи пĕрремĕш тата виççĕмĕш пушарсем мунчара тухнă.

Мунчасенче пушар тухнин тĕп сăлтавĕ - кăмакапа тĕтĕм тухмалли пăрăх юсавсăр пулнинче. Çавăнпа та тĕтĕм тухмалли пăрăха тĕрĕслесех тăмалла. Унăн япалисем вырăнтан шусан çурăкран тĕтĕм тухма пултарать. Никĕсне те пăхсах тăмалла - вăл çирĕп-и?

Аса илтеретпĕр: урай йывăçран е çунакан ытти материалтан пулсан, кăмака алăкĕ патне 50х70 сантиметртан кая мар хурçă листа хумалла. Пăрăх çỹллĕшне тĕрĕс вырнаçтармасан та пушар тухас хăрушлăх ỹсет. Çавăнпа та специалистран пулăшу ыйтмалла. Пăрăхра пухăнса тăнă хăрăм та пушар сăлтавĕ пулма пултарать - ăна тасатсах тăмалла. Пушар хăрушсăрлăхĕн правилисене те пăхăнмалла. Вутта хăвăрт вут илме пултаракан шĕвексемпе чĕртме кирлĕ мар. Çунакан кăмакана тимлĕхсĕр хăварма юрамасть. Çак ĕçе ачасене ан шанăр. Çавăн пекех кăмакана уçă алăкпа хутма юрамасть.

Округра пурăнакансене кăмака вырнаç-тарнă, тунă тата унпа усă курнă чух пушар хăрушсăрлăхĕн правилисене пăхăнма, вут чĕртсен асăрхануллă пулма чĕнсе калатăп. Пушара сỹнтерме мар, асăрхаттарма çăмăлрах. Енчен те пушар тухсан е асăрхасан тăхтаса тăмасăр сотовăй телефонпа 101 е 112 номерсемпе, ахаль телефон урлă 01 номерпе шăнкăравласа пĕлтерĕр.

Алексей ЯРАБАЕВ, пушар асăрхавĕпе профилактика пайĕн начальникĕ